عشا البايتات كفاك اعوج تعال راجع تعال
وراك مرق الصبر سوس واكيد كل الرصاص واقع تعال راجع
بخاف لك من قفاك يضيع وراك زي ما هناك ضايع
مشتت لا فهم لا راي شبعان والوراك جايع تعال راجع
سحابا شتتو الاعصار مسافر في سماك صابع
تتاجر في العمر وايامو خسران شاري او بايع تعال راجع
زمان كنت القعر والراس نازل في البلد طالع
واسع حليلك حليلك يا البقيت تابع تعال راجع
كيف الزول يقاسي الغربه ..ما بين نوح انين وشقا
يلقي رويحتو ودر عمرو لا ارتاح لا مراضو لقا
كم من فينا شال احلامو شالع بالامل برقا
قام قاصد الريال وبهاه سوا الحج قتا ودرقا
باع الفي المراح والمسري حتي الفي الايدين مرقا
خجلان قال تقيلتي وراي يحفظا ربنا الخلقا
كم من فينا همل دارو اسرتو للضياع طلقا
غرقت في الديون خلاها مكشوف للخلوق ورقا
فينا الام ولادو وراه باعت سلسلا وحلقا
شالت فوق هموما الفوقا شوقا وحرقتا وقلقا
الله من مرارة الغربه من دفيرا من صبقا
من تعب شبابنا الزاهي اياموالنضار محقا
فيها جراحنا كل ما تبري ما نعرف شنو الفتقا
اما الروح من الشايلاهو تمرق لو في زول نتقا
غايتو انا من بلاد الغربه روحي الله خلاص عتقا
راجع لبلادا ديمه حامدي وراضي بي رزقا
للجد الوريفه الرحمه للعرجونه للابقا
للوسط الاهل تلقاها لو كان حتي بي مرقا
مشتاق لتراب اوطاني لاحساسا لصدقا
للبهم التصيح في مراحا للنيل التسابو بقا
لقوز الرمال والشله لقعدتنا في حلقا
لختفة تعوس الوالدي قبال ما تصل طبقا
اعرض في البلد بي بطولا دي الماليني تبع وشقا
لاخوف هيبه من الكشه لاقي النوم من الشفقا
انعم فيها بالحريه دي المن غيرا مافي لقا
والمو شاد رحالو وراي مويتو علي السراب دلقا
نسلم فيك ياسودانا من مسك الارض عزقا
شتت في التراب دم قلبو بي حن الابوه سقا
يسلم فيك من ضارك شالك في العيون حدقا
دنقر لتقيلتك شالا عندو امانا ما سرقا
لو باقي لي يوم في الدنيا ومنو وتزبل الصفقا
مابندم بعد القاك وانزر روحي ليك صدقا
اخر امنياتي بقولا لو بيناتنا مافي لقا
اسمك خشمي لو كان متا يبقي اخر حروف نطقا
الأربعاء سبتمبر 30, 2009 10:46 pm